KIDHUNG ING DUKUH GIRAH VII

4 min read

1 Juli 2023 Hendry Noesae

KIDHUNG ING DUKUH GIRAH VII
Th. 962 Saka (1042 M)
Mimin S

3. Grubuk saka nduwur Gumuk.

Esuke isih asrep, srengenge saka bang wetan awarna jene nembus pedhut. Si Nini ramban gegodhongan kanggo olah-olah ing dina kuwi. Lakune thumuk-thumuk menehi pawarta marang tangga teparone kang kaletan tegalan lan bulak. Yen wiwit dina iki ada-ada akon masang sikep ing sakduwure lawang lan jendhela. Tanggane, ana sing percaya ana sing ora, amarga akeh-akehe padha crita yen si gendhuk Rumi ilang saiki dadi golek-golekan. Gage Nini mulih lan crita menyang si Aki.

” Ki, onten pawartos bilih nduk Rumi ical, lan kalawau dalu mboten wangsul.. Ki… tengah dalu … njenengan mambet …gek…gek…” Si Nini groyok anggone olehe kandha.

” Ketiwasan Nyi, gek sapa sing duwe ngelmu guna dhesti Aji Pangleyakan… hmmm. Ngelmu kang saka Tantrayana. Ya wis Nyi, awake dhewe wis wara-wara menyang tangga teparo. Ditampa mangga, ora ditampa ya mangga. Mugi aku lan kowe salah, bawane wong tuwa wis pikun. Ning ora ana alane yen awake dhewe siyaga wiwit ngko bengi. Sing tak rungu, manthere golek wektu wulan purnama kalane sasadara manjer kawuryan. Kuwatna atimu lan ragamu, nunggu tekane dina taliwangke mengko… wis kana ndang olah-olaha .”

Dina katelu, nedheng awan wong-wong desa isih durung ngrumangsani, umyeke nglaksanaake padinan lumaku kaya samestine. Ning ing Njero Ndalem Ageng wiwit nggarap lan golek srana kanggo mengko bengi. Nyai Calonarang babar pisan ora medal saka Sanggah, tansah asikap mudra madhep ing sangarepe reca Bathari Dhurga sesembahane.

Tengah ratri .
Swasana tintrim , langite padhang sumilak. Ning ana swasana kang aneh kang njalari wong-wong gemang metu. Kabut saka gunung Kampud( saiki gunung Kelud) tumurun nambahi kekes.

” Cening jak sapta tiang kel ngorin cening, orahin jak sisya- sisya anelennan. Saiki sube teka, titiang kal nuuin mekejang ngelmu pangleyakan. Jani rage jak mekejang ngaenang sak desa Gurah grubuk arupa penyakit .”
Bebisik Nyai Calonarang marang andahane, wong pitu kang wis wasis ilmu dhesti minangka cucuk lampah disurung para dhemit-demit srayane Ilmune Nyai Calonarang.

Kinupeng wong pitu pandhereke kang gawe kalangan, Nyai Dhatu jejogedan kang ditabuhi cangkem karo Nyi Londe, Nyi Lindi, Nyi Sedaksa lan Ki Larung, Ki Guyang, Ki Mahesa wardhana, lan Ki Sangkan.
“Cikenang… cikempong… cikenang, cikempong ” terus-terusan…. karo mripate merem lan driji mbegar aneng ngarep dhadha.

Tan kocapa, aneng kuburan, kanggone mayit kang durung sampurna amarga ngrantos upacara Ngaben ,… padha pating brubul ragane rusak pating sluwir, ndadekake hawane katindhihan bacin lan arus…

Bathang bareng karo durubiksa, kemamang, ilu-ilu banaspati, sirah sakisine weteng tanpa gembung nyekakak padha metu iber nyang ndalan-ndalan, barengi asu mbaung gagak gaok-gaok lan lawa padha mbekis ngisis untu. Kabeh nggawa penyakit… endhih pating sliwer menyang omah-omah.

Wong-wong sing isih jejagongan aneng lincak neng emperan sakala buyar karo mbengok kamigilen… wengi Respati manis gegancangan Kajeng kliwon nedheng purnama sidhi para setan kembul bojana kekitrang golek memangsan.

Wengi kang kekes nggegirisi, para wadon padha ngekep bayine, sing durung duwe anak padha ndelik ing rangkulane priyane, sing durung akrami ndusel nyandhing bapa biyunge. Endhih kang iber nggawa penyakit padha mlebu omah ngiteri karo nyebar grubug. Pagebluk ageng tumama ing laladan Gurah Kediri.

Mung sawetara omah-omah dhadhuk prasaja ing lengkehing jurang kidul gumuk kang kalis diliwati, amarga kaprabawan sikep lan kekidhungan Vedha kang nganyut-anyut nggawa hawa panas kanggone grubug kang sumebar.

Piye kadadeyan sesuke ….?

(Ana tutuge)