KIDUNG ING DHUKUH GIRAH XII

4 min read

1 Juli 2023 Hendry Noesae

KIDUNG ING DHUKUH GIRAH XII
Th. 942 Saka ( 1042 M )
Mimin S

7. Asmarandana

Dukuh Girah wis ora sepi, taman sisihe Sanggah tansah asri, lan donya dadi endah nengsemake. Kuwi sing dirasakake wong kang ketaman asmara kaya Bahula lan Ratna Manggali. Wong yen nyawang bisa dadi meri, merga sing putri sulistya lan sing kakung bagus pidheksa, pasangan kang banget imbang pindha Kamajaya lan Ratih. Ibu Dayu Datu kalegan penggalihe, pandhereke iya melu dhemen nyawang kang lagi karonsih.

Ora nganggo pahargyan kang regeng, Ni Ratna lan Ki Bahula wus dadi salaki rabi, karesmekake keng ibu Gusti Putri Mahendradhatta dhewe, menggo nek wis diboyong nyang kutaraja Daha arep nganakake pahargyan kang mesti dirawuhi Pr. Airlangga sesembahan kang banget disuyudi kawulane.

Kawitan Ki Bahula amung nylamur ngupaya ngredhem ontran-ontran, ning ora ngira yen Ni Ratna jebule wanita kang banget luhur bebudhene, alus manuhara lan pinaringan rupa kang sulistya mranani.

Saka ukara
” ngorbanake masa mudhane karana tugas nagara ” lan “mesakake prawan Retna Manggali nora payu laki ” dadi gandrung kasmaran datan genggang sarambut tenan, Ki Bahula nibakake tresna kang tulus lan ngemban dhawuh sang nata den lakoni bebarengan tanpa kangelan.

Kosok baline Ni Ratna Manggali, suwe ngrantos rawuhe kakung kang bisa ngayomi lan sesendhenan kalaning sepi. Pangrengkuhing kakung lan pangrasa kang ngelak cecaketan gepok senggol antarane jalu wanita kang dangu dirantos … saiki lagi dirasakake. Tu Biang asring ngekep lan ngarasi pipine tandha asihe, ning seje yen kakang Bahula sing ndekep lan ngarasi pipi lan lambene krasa kaya geter murube geni berahi kang biyen amung di bayangake. Ana rasa kangen sing ora ana uwise, apamaneh yen lagi andhonsih necep maduning asmara aneng tilamsari, kaya- kaya mumbul ing swarga lali dalane mbalik menyang wisma. Dayane rasa brangta tan bisa dipepalang gunung sap pitu. Ni Ratna Manggali pasrah jiwa raga tanpa cubriya, ati putih tulus kasok marang garwa.

Rumangsa ditresnani, krasa yen dipepuja, dhasar bagus lahir batose Ki Bahula uga ora lelemeran nampani sakabehing pangrasa kang suci saka garwane sing banget tulus. Ki Bahula nelakake yen tansah ngayomi lan nresnani Ni Ratna, lan ora ngluputake Nyai Calonarang yen banget tresna, lan ngeman uga tansah ngayomi marang putrine sing kaya golek kencana.

Telung candra ora krasa wis lumajar nderek kreta mangsa……
Ki Bahula saiki wis pana tenan yen garwane banget seje karo Ibune. Nadyan kira-kira Kanjeng Ibu dek timure kira-kira ya ayu kadidene putrine, ning merga lahir lan dewasa ana ing njero kraton kang kinupeng kamulyan karana samubarang dicawisake abdi lan emban, Kanjeng Ibu pancen putri kraton kang kagungan kesempatan nodhi sakabehing ngelmu. Lan tanpa kanyana ajar ngelmu Pangleyakan saka Kitab Kalacakra paringane Dang Acarya Siwamurti kang wis kasedanjati amarga yuswa sepuh. Dasare putri kang lantip , cerdas lan kasurung watak rada angkuh, Putri Mahendradhatta gampang nadhahi ngelmu kang kalebu wingit, amarga mantram aliran Tantrayana Shiwabudha penganut Bethari Dhurga nduwe sifat bisa ngereh marang kiwa lan ilmu setan kang nggegirisi. Ning merga sregep lan bakat, Sang Putri kagungan kasekten kang dhuwur tingkatane. Amung kalah setingkat karo keng garwa ya Gusti Dharma Uddhayana Warmadhewa kang ngilut Hindu Syiwa. Lan Sang Prabu wis paring pepenget yen Tantrayana ora diparengake ing kraton Bedhahulu Gianyar.

Aneng tilamsari.
Ki Bahula kudu nemokake rontal kang isi Panggendham Kalacakra kang diasta Ibu Dhayu Dhatu. Atine goreh, ning isih durung wancine takon-takon bab ngelmune Ibu. Ki Bahula nyawang pasuryane Ni Ratna kalaning sare abebantal lengene, Ni Ratna yen sare kaya bayi. Kringet aneng bathuk sisane andon asmara di usapi kanthi asih, slimute ditutupake anggane kang isih nglegena lan alon-alon menyat nyaut sinjang lan ora kajarag sukune tumuju menyang njaba… karepe kepingin ngrasakake ndeleng sunare sasadara kang nedheng purnama. Kandheg olehe mlampah bareng krasa mak sriwing saweneh ganda gahuru (menyan),
Bahula kandheg lan banjur ngiling-ngilingake…

( ana tutuge )