KIDHUNG ING DUKUH GIRAH VIII

3 min read

1 Juli 2023 Hendry Noesae

KIDHUNG ING DUKUH GIRAH VIII
Th. 962 Saka (1052M)

3. Grubug saka gumuk.

Wengi kekes para setan pada gegojegan parisuka merga wis di paringi palilah Hyang Durga. Nunggang sumilire angin karo nggembol cethik arupa penyakit kang nora ana tambane. Amung wong-wong kang melek maos Kekidhungan puja-puji mring Hyang Widhi Wasa lumantar kitab Vedha, klebu Nini lan Aki kang wus sepuh kuwi. Dina sesuke dadi dina Tali Wangke ( tali mayat – pen ) kanggone laladan Gurah Kedhiri.

Sesarengan sunare Bhagaskara saka brang wetan, mara gage para setan lan lelepah angslup lan mbekik bali mring dhangkane. Lan Sanggah sepi, mung kumelune pega menyan sisane wengi …..

Nyi Calonarang sedakep sare karo sila aneng klasa sakngarepe reca Sang Bathari, dene andahane gumluntung turu kepati merga tenagane kakuras kanggo ajang nadhahi setan kang sengaja di undhang.

Molet saka anggone kasilep kang dawa Ratna Manggali kethip-kethip merga ana sunar srengenge kang nrobos gedheg ing senthong patilemane, gurawalan tangine bareng mireng jerit tangis ing omah kang paling cedhak saka Sanggah.

” Wah ….ana apa kok pating jlerit iki …. .” Panglocitane, agahan menyang sumur butuh raup, nyaut slendhang Ni Retna gage mlayu mudhun tumuju marang omah kang nuwuhake swara jerit cumlengking kuwi.

Apa kang didulu Ni Ratna agawe atine kekes ….. tanpa kajarag, sikile jumangkah ngetutake pikirane arep tetulung marang sapa kang lagi nandhang sungkawa. Ning, pundhake disaut cek, Ki Guyang njur gedheg, drijine nudhing ing arahe njero Sanggah.Meh bae tangane Ki Guyang ditampel, Ni Ratna banjur kelingan yen wingi karo biyung ora dikeparengake ngaton soroh pangina menyang dukuh.

Aneng dukuh kapireng swara pating jlerit lan tangis, njerit merga lara, kamigilan lan sakit. Banjur njerit maneh, nangisi merga sing lara mati dadakan, sing waras dadi lara …… lan kabeh mau agawe atine Ni Ratna sedhih lan ora tega. Ni Ratna wis apal lan ngerti yen Tu Biang sing ditresnani kuwi sing nindhakake Aji Wegig Pangleyakan karo andahan siswa kinasihe.

Aneng sawijining omah kang bawera, omahe Ki Buyut Gurah. Swara pating jlerit ngeres-eresi. Ki Buyut wis dadi layon, kang ngeget-egeti, kulite Ki Buyut mrumuh kaya kesiram banyu panas, lan warna getih. Dumadakan bojo tuane Ki Buyut njerit dawa terus mak plepeg, kekejer ….. ora gantalan suwe, pleg ….. less mati. Sakala jerit tangis kluwargane njebolake kuping ….

Lan ora mung wengi kuwi kadedayan kaya mangkono. Wengi sesuke Desa Gurah isih disaba tenung, ing ndalan-ndalan ajeg di nggo jejogedan setan priprayangan dhewe. Grubug, utawa pageblug isih lumaku ing bumi Dhaha …..

Ana tutuge.