KIDHUNG ING DUKUH GIRAH IX

KIDHUNG ING DUKUH GIRAH IX
Th. 962 Saka ( 1042 M)

4. Prabu Airlangga.

Aneng Kraton pinuju pasewakan, Prabu Airlangga jumeneng ing Manguntur Tangkil, ana Patih Narotama kang sekti, uga para nayaka kang lagi marak ing paseban. Salah siji nayaka ana kang apangkat Senapati, isih mudha taruna lan durung palakrama. Nderek marak seba kawistara yen kagungan pangkat dhuwur, asmane Senapati Bahula, kang sila andhap asor marang ngarsane Sang Prabu.

Durung tutug anggone padha pangandikan, dumadakan katungka prajurit jaga kang sowan, atur sembah saka kadohan, gage Sang Prabu ndangu,

” Eh, prajurit jaga …ana parigawe apa dene ora katimbalan marak marang paseban ?.”

” Pangapunten Gusti Prabu, menika wonten Kaki-kaki saha Nini-nini saking Dukuh Girah badhe matur menawi wonten prakawis pagebluk ingkang damel pepejah warga dukuh, menapa dipun parengaken minggah asung pawartos, Gusti …?”

” Gage , jaken marak ing ngarsaningsun, prajurit ..”

Si prajurit ora suwe bali marak anganthi Kaki lan Nini kang lolos saka Dukuh Girah, lan nedya asung palapuran marang Prabu Airlangga minangka sesembahan kang bakal paring pangayoman lan margi lukaring pagebluk kang ana padukuhan.
Akeh-akeh si Kaki lan Nini matur apa anane kadadeyan kang nggegirisi ing padukuhan Girah, kang tembene nyuwun sarana piye carane paring wudhar ananing pagebluk kang disebabake paekane pawongan kang kagungan Ilmu Pangleyakan kang peng-pengan.

Njegreg dheleg-dheleg pindha tugu sinukarta Sang Prabu, penggalihae kejot lan tuwuh pangosik, aja-aja keng Ibu Putri Mahendradhatta sing gawe dredhah lan pituna, amarga Sang Prabu kemutan duk isih mudha yuswa nembelas warsa karo bapa pamomonge ya Patih Narottama saha sepuluh punggawa kang nderekake tinjo saka Balidwipa menyang paman Prabu Teguh Dharmawangsa ing Medhang, si Ibu isih nggarbini lan adi-adine isih cilik-cilik( Gusti Ageng Marakata lan Gusti Alit Anak Wungsu). Lan rikalane sang Prabu Airlangga kasengkakake dadi Prabu ing Kahuripan, mireng pawartos yen keng Ibu seda (1009M). Ning, ana bebisiking maruta saka Kraton Bedahulu Balidwipa yen keng Ibu katundhung dening Rama Prabu Uddhayana merga ngilut ngelmu desti, Ibu pancen nganut Hindhu kang taat, putus sakabehing kitab, lan setya tuhu asung sesaji mring Sang Bathari Durga. Sang Prabu Airlangga mangertosi yen yektine Ibu Mahendradhatta pengagem Ngelmu Leak Tantrayana kang dhuwur. Penggalihe dadi susah lan sewu bingung ……

Sakwuse paseban dipungkasi, Sang Prabu age-age menyang tamansari. Ing taman sari tumlawung sajak sungkawa banget, lan mung Patih Narottama lan Senapati Bahula kang tansah setya ngetut wingkinge Sang Prabu.

” Dhuh, Prabu … sesembahan kawula, menapa ingkang dados penggalih panjenengan. Mugya saget paring dhawuh dumateng pun Bapa ingkang sampun Jmp sepuh menika. Mbokmenawi saged lejar ing penggalih … mangga panjenengan dhawuh nakmas Prabu …..”
Manohara aturing Patih Narottama marang ratu gustine kang lagi nandhang sungkawa.

” Iya-iya Bapa … bareng kaki-kaki lan nini-nini mau arsa caos atur yen ana pageblug aneng Dukuh Girah, ingsun kok dadi kemutan lelakone Keng Ibu aneng Bedahulu.
Bapa apa ora kemutan yen Keng Ibu tansah atur sesaji marang Bathari Dhurga, sing manut pamawasingsun nglandhepake Ngelmu Kalacakra Tantrayana, ndadekake Keng Rama Prabu Dharma Uddhayana duka yayahsinipi lan lingsem dene prameswarine ngagem Ngelmu Aji Wegig kang dadi pangilute setan… dhuh, bapa ….nadyan kayangapa kuwi Keng Ibuku.. ingsun uga kapang banget marang Kanjeng Ibu , apamaneh kagungan putra sing nalikane katundhung jengkar saka kraton isih ana bayi. Piye yen pengagem Ilmu Leyak kang nuwuhake gara-gara kuwi Keng Ibu tenan ……???” Ngrerepa Prabu Airlangga olehe sesambat merga sujana marang Keng Wibi kang tansah dikangeni lan ditresnani.

” Gusti sesembahan kula, menawi panjenengan tidha-tidha, mangu-mangu menika leres Keng Ibu menapa mboten, kersaa ngutus punggawa ingkang mumpuni ingkang sampun tepang kaliyan Gusti Putri Mahendradhatta, dateng dukuh Girah, kulak pawartos.. sinten ingkang kawastanan kagungan Ngelmu Dhesti menika, lan kenging menapa sababipun kedah para kawula sak padhukuhan ingkang nandhang kapitunan. Lajeng panjenengan kersa ngaturi bapa Bharadah ing Lemah Tulis mundhut supados rawuh ing Kraton, Gusti …” karo atur sembah Patih Narottama kang wicaksana atur pamrayoga marang Gusti Prabu Airlangga.

” Mangkono ya bapa Patih , aturmu banget tak sarujuki. Lan sekirane sing tak utus mara lan nyatheti kahanan ing Girah kuwi Ki Mahesa Wulung wae ya Bapa Patih …. dheweke nadyan wis sepuh, ning isih pidheksa lan pana banget mring Keng Ibu Mahendradhatta. Yen tenan kuwi keng Ibu, arep tak aturi kondur ana Dhaha wae, yen kuwi dudu keng Ibu, ingsun arep dhawuh yen pagebluk iki kudu dipungkasi. Lan, paraga sing nindhakake Guna Dhesti di ruwat supaya wigar dening Bapa Empu Baradhah .”

Cekak aose, ature Patih Narottama katampa dening Prabu Airlangga. Lan sak banjure utusan marang Ki Mahesa Wulung kakanthi prajurit sepuluh menyang dukuh Girah. Lan ngutus Senapati Bahula ngaturi Mpu Bharadah kang minangka guru agung kraton Kahuripan kang wis jengkar menyang Kediri (Daha – 1041 M). kebeneran Senapati Bahula uga minangka siswa utamane Sang Empu sakti saka desa lemah Tulis ya katelah Lemah Caitra.

Saiki Prabu Airlangga, kari ngrantos pawarta saka utusane.

( ana tutuge)

………….
KIDUNG ING DUKUH GIRAH I
KIDUNG ING DUKUH GIRAH II
KIDUNG ING DUKUH GIRAH III
KIDUNG ING DUKUH GIRAH IV
KIDUNG ING DUKUH GIRAH V
KIDUNG ING DUKUH GIRAH VI
KIDUNG ING DUKUH GIRAH VII
KIDUNG ING DUKUH GIRAH VIII
KIDUNG ING DUKUH GIRAH IX
KIDUNG ING DUKUH GIRAH X
KIDUNG ING DUKUH GIRAH XI
KIDUNG ING DUKUH GIRAH XII
KIDUNG ING DUKUH GIRAH XIII
KIDUNG ING DUKUH GIRAH XIV
KIDUNG ING DUKUH GIRAH XV
KIDUNG ING DUKUH GIRAH XVI
KIDUNG ING DUKUH GIRAH XVII
KIDUNG ING DUKUH GIRAH XVIII
KIDUNG ING DUKUH GIRAH XIX
KIDUNG ING DUKUH GIRAH XX