KIDUNG ING DUKUH GIRAH X

4 min read

1 Juli 2023 Hendry Noesae

KIDUNG ING DUKUH GIRAH X
Th.962 ( 1042 M )

6. Pasewakan.

Ki Mahesa Wulung dadi mangertos mulai wiwitan nganti pungkasan marang lelakon dumadining pageblug. Gusti Putri Mahendradatta kang saiki kawastan Dhayu Dhattu ya Nyai Calonarang mbeberake lelakon kang marahi lara ati lan sedhihe Putri Retno Manggali. Nanging Nyai Calonarang ora kersa jengkar mring kedhaton, amarga rumaos luwih bisa mardhika asung pepuja mring bethari. Akeh-akeh pangandikane Nyai Calonarang marang Ki Mahesa Wulung, kang dinayogyani ora di bantah. Sawuse dirasa cukup, nuli pamitan wangsul kedhaton asung palapuran. Ning sadurunge jumangkah, Nyai Calonarang bebisik marang Ki Tunggul Wulung, yen diutus matur marang Sang Prabu Airlangga yen Sang Ibu mundhut supaya diruwat.

Aneng kedhaton sesuk e Sang Prabu Airlangga ngersakake nampi palapuran saka punggawa utusan ingkang kasebat. Saha mangayubagya rawuhe Bhagawan kang kaloka tuhu sekti lan wicaksana, yakuwi Mpu Bharadah saka Lemah Tulis ya katelah Lemah Caitra.
Bareng wayahe ndungkap tengange, Ki Mahesa Wulung atur palapuran jangkep ora diwuwuhi lan uga ora dikurangi,
” Atur sembah kula Gusti Prabu, sanget mboten kanyana menawi Nyai Calonarang menika leres saestu Keng Ibu, Gusti Ratu Mahendradatta Gunapriya Rajapadni pribadhi, panjenenganipun ugi ngendhikan menawi ingkang adamel Grubug inggih Gusti Putri, kanthi alesan menawi gerahmanah dumateng warga Girah ingkang tumindak sawiyah dumateng rayi paduka inggih Gusti Putri Retno Manggali”.

” Dhuh jagad wawesaning bathara ….rak tenan to, apa kang dadi sekeling penggalihku, Keng Ibuku kang dadi memala kagungan ngelmu dhesti….., apa ….aturmu kuwi mau ? , rayi…. aku duwe rayi ?, kepriye aturmu mau…?.” Sang Prabu kejot ing penggalih bareng mireng yen isih duwe rayi wadon tunggal yayahwibi.

” Leres Gusti, asmanipun Gusti Ayu Ni Retno Manggali, kang kagungan pasuryan ingkang ayu sanget. Lhah yuswanipun sampun ndungkap cekap, dereng wonten ingkang sowan nglamar dumateng keng ibu. Ingkang nuwuhaken Gustri Putri Retna Manggali dipun reraosi,dicatur, saha dipun sawiyah dening warga,nah………. menika ingkang ndadosaken Keng Ibu ical kasabaranipun……”

Akeh-akeh ature Ki Mahesa Wulung menyang sesembahane, lan uga bebisik welinge Gusti Ratu katur putra mbareb ya Sang Prabu Airlangga piyambak. Ature Ki Mahesa Wulung mau disemak ing pasewakan agung, saha dimidhangetake kanthi premana dening Dang Acarya Bharadah. Lan saka pasewakan agung kuwi nuwuhake rencana kang sigra katindhakake, kepriye carane ngruwat Ilmu Kalacakra kang diagem dening Nyai Calonarang, lan ngentas panandhange Ni Retno Manggali. Sang Prabu saiki rada lejar penggalihe.

Senapati Bahula kang uga minangka cantrik Mpu Bharadah ngaturake kesanggupan yen kudu nglamar Ni Retno Manggali, lan golek sisik melik Ilmu Kalacakra. Nadyan dudu duta amungkasi, ning kuwi kalebu tugas kang abot. Senapati mudha kuwi mratelakake kesanggupane. Lan ora nunggu suwe, sesuk uga budhal ngayahi sesanggeman kang ora gampang kuwi.

Lakune ora kesusu, Bahula ngrantam siasat, apa wae sing sekirane kudu ditindhakake mengko yen bakal ngadhepi Nyai Calonarang dalah putrine. Ati mudhane karintik kepengin nyumurupi Ni Retno Manggali kang kondhang ayune, malah atine uga nduwe rasa mesakne marang lelakone Ni Retno kang nandhang rudhatin.

Tekan gapura padhukuhan, kandheg lakune Bahula ngenam pikiran. Sang mudha linggih ing watu sapinggire kali sawah, capung buyuk didlesepake nutupi rai amarga saka katebihan katon lakune wanita tua lan mudha kang kapinujon arep budhal menyang belik ing pojok desa.

( ana tutuge)